دكتوراة في " حتي "

بقلم: أ.د.عمرو حسن الحسني أستاذ المخ و الأعصاب جامعة القاهرة

#بوست_الجمعه النهاردة عن "حتي"

أيوة ..حتي .. بتاعت الأيدي الناعمة ..الراجل اللي كان معاه "دكتوراة فى حتي"😂

فكرة فلسفية كدة .. دماغي قادتني ليها منذ سنوات 🤨 معلش استحملوني فيها حتي آخر البوست

بمرور الوقت أدركت أنه لابد لك من "حتي" دنيوية ثم قادني ذلك لأن أدرك أنه لابد لك أيضا "حتي" آخروية .. تعالوا نشوف إزاي 🧐

١- أنا مثلا مجالي العام هو الطب و الأخص هو المخ والأعصاب و الأكثر تخصصا هو التصلب المتعدد (إم إس) .. و عايز اقول لكم إني فعلا مش ملاحق علي كم التطور العلمي و الأبحاث الجديدة في مجال الإم اس لوحده 🙆‍♂️🙆‍♂️

.. ففي هذا العصر اللي بيدعي إنه بيفهم في كل حاجه هو غالبا عنده فكره عن كل حاجة و فكرته قشرية جدا عن كل حاجه ...لأنك لو تعمقت و توغلت في تخصص دقيق فلن يسعفك الوقت لإدراك ما سواه

٢- لذلك دائما من يطلب مني النصح من شباب الأطباء أوجهه إلي

Subspecialty

أو التخصص الدقيق .. يعني امسك حته في تخصصك مهما كانت دقيقة و تعمق و توغل و انتشر فيها حتي تكون أبرع من فيها

فالعالم ليس في حاجه لمزيد من "القشريين".

٣- ثم قادني تفكيري رويدا رويدا إلي فكرة " التخصص مع ربنا"

يعني انت مع العبادات عايز تبقي (GP أو ممارس عام) بلغة الطب .. يعني بتعمل العبادات العامة و بس و لا عايز تبقي كمان متخصص في عبادة معينة و لا أقول علم ديني معين فهذا يقوم به المتخصصون و هو فرض كفاية و ليس فرض عين .

بمعني أنه إلي جانب العبادات الأساسية و الرئيسية و هي الفروض

يبقي لك من تخصص .. من عبادة تتخصص فيها و تتقنها فتصبح من أهلها

٤- عشان يوم القيامة تبقي واقف مع الاستشاريين مش بس مع ال GP.. استشاريي قيام الليل .. استشاريي الصيام.. استشاريي الصدقة .. استشاريي إطعام الطعام.. و هكذا .. تبقي واقف مع الناس الجامدة و الكبيرة.

٥- الفكرة جاتلي ازاي .. هأقول لكم ..أول حاجة

وجدت أنه في كثير من المواضع يصف القرآن و في السنة

تصف فيها فئة معينة بصفتين أو ثلاثة و تعلل مكانتهم بها

زي مثلا آيات الذاريات

إِنَّ الْمُتَّقِينَ فِي جَنَّاتٍ وَعُيُونٍ * آخِذِينَ مَا آتَاهُمْ رَبُّهُمْ إِنَّهُمْ كَانُوا قَبْلَ ذَلِكَ مُحْسِنِينَ * كَانُوا قَلِيلًا مِنَ اللَّيْلِ مَا يَهْجَعُونَ * وَبِالْأَسْحَارِ هُمْ يَسْتَغْفِرُونَ * وَفِي أَمْوَالِهِمْ حَقٌّ لِلسَّائِلِ وَالْمَحْرُومِ

و زي مثلا صفات عباد الرحمن في الفرقان

وَعِبَادُ الرَّحْمَنِ الَّذِينَ يَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا * وَالَّذِينَ يَبِيتُونَ لِرَبِّهِمْ سُجَّدًا وَقِيَامًا *

و مثلا في رحلة الإسراء والمعراج لما رأي النبي صلى الله عليه وسلم

قوما يزرعون ثم يحصدون فيطلع زرع تاني مكانه فلما سأل سيدنا جبريل قال له.. هؤلاء المجاهدون في سبيل الله و المنفقون .. تضاعف حسناتهم ٧٠٠ ضعف

٦- اللي أقصده .. أن دول أكيد كانوا بيعملوا العبادات كلها و الفروض كلها و هو المجال العام (زي مثال الطب كده) ثم تخصصوا في عبادة معينه (زي مثال المخ والأعصاب ) ثم اتقنوها و أصبحوا من أهلها(زي الام اس كده) فبلغوا بفضلها مكانة ما كان لهم أن يبلغوها بغيرها

٧- التخصص مهم أوي لأنه واضح أنه في الآخرة ستتجسد الأشياء المعنوية و ستتكلم و تنطق و ده باين من أحاديث الرسول صلى الله عليه وسلم

مثلا (الصيام والقرآن يشفعان للعبد يوم القيامة، يقول الصيام: أى رب، منعته الطعام والشهوات بالنهار، فشفعنى فيه، ويقول القرآن: منعته النوم بالليل، فشفعنى فيه، فيشفعان)

و مثلا آخر

اقرؤوا الزَّهراوَين: البقرةَ وآل عِمرانَ، فإنهما يأتيان يومَ القيامة كأنَّهما غمامتانِ أو غيايتانِ أو فِرقانِ مِن طيرٍ صَوافَّ تُحاجَّانِ صاحِبَهما

يعني سورة البقرة و آل عمران لو تخصصت فيهما هتيجي يوم القيامة تدافع عنك و تبقي هي واسطتك عند ربنا

الواسطة دي محتاجه أنك تكون ملازمها في الدنيا كي تلازمك في الاخرة

أهل العلم يقولون "إذا استحكمت المرافقة تعذرت المفارقة"

٨- اللي عايز أقوله ..تخيل انت يوم القيامة .. اليوم المرعب دة .. و في وسط زحام مليارات البشر .. هتبقي محتاج واسطة .. واسطة تعديك من الطابور..و تعديك بأمان إلي الجنة .. الواسطة دي هي "حتي"

هي التخصص.. هي العبادة اللي فضلت طول عمرك تعملها

حتي عشان الواسطة اللي هتعديك تعرف هتقول عنك إيه

كان بيعمل إيه .. كان علي طول بيعمل إيه..

لذا راجع نفسك بعد البوست ده

انت ايه اللي بتعمله علي طول ؟؟؟ مقصدش الماتشات و المسلسلات😏😏

أقصد متخصص في إيه من العبادات؟؟

إيه هي "حتي" بتاعتك .. لو مفيش .. يبقي انت يوم القيامة هتبقي واقف بطولك من غير واسطة..!

٩- الحاجة اللي أنصح بيها نفسي قبلكم

لو معرفتش تتخصص في " حتي " حلوة 😍

أوعي تتخصص في "حتي" منيله 👹👹

يعني متبقاش الناحية التانيه ..مع استشاريي الشرور

اللي كانوا متخصصين في المعصية

كقوله تعالى " ما سلككم في سقر قالوا لم نك من المصلين ولم نك نطعم المسكين وكنا نخوض مع الخائضين "

و زي ما الرسول مثلا قال"لمَّا عُرِجَ بي مَرَرْتُ بِقومٍ لهُمْ أَظْفَارٌ من نُحاسٍ ، يَخْمُشُونَ وُجُوهَهُمْ وصُدُورَهُمْ ، فقُلْتُ : مَنْ هؤلاءِ يا جبريلُ ؟ قال : هؤلاءِ الذينَ يأكلونَ لُحُومَ الناسِ ، ويَقَعُونَ في أَعْرَاضِهِمْ "

١٠- بعد البوست ده ياريت كل واحد قرأه .. يقرر حالا ايه هي "حتي" بتاعته .. هيتخصص إيه .. ؟؟

أسأل الله لي و لكم الإخلاص و القبول